एवढीच चुक तिची...Kiran Jadhav

तो आला काय अन गेला काय, 

ती वाहत राहिली, त्याच्या प्रवाहात
फक्त जळत राहिली, त्याच्या विरहात...

रडली - खचली,
त्याने दिलेल्या सुख-दु:खांचा
हिशोब मांडत बसली...

त्याचं येणं हे तिच्यासाठी मुसळधार पावसासारखं
चिखल करणारं, डोळ्यात पुर आणणारं
कदाचित असेल तो वळवाचा पाउस
नकळत येणारा, मातीला गंध देणारा...

त्याचं येणं हे तिच्यासाठी चक्री-वादळासारखं
पाला-पाचोळा करणारं, स्वप्न चक्काचुर करणारं
कदाचित असेल तो वार्याची झुळुक
हवीशी वाटणारी, अंगभर सळसळणारी...

त्याचं जाणं हे तिच्यासाठी असच, पूर्णविरामासारखं
संपवणारं - अंत करणारं
श्वासांना कायमचं शांत करणारं...
हरवत राहिली स्वत:ला ती, त्या पूर्णविरामानंतर
शेवट पाहत राहिली स्वत:चा, त्या पूर्णविरामानंतर...

एवढीच चुक तिची...
ती विसरली नवं वाक्य लिहायला, त्या पूर्णविरामानंतर
ती विसरली नवं आयुष्य जगायला, त्या पूर्णविरामानंतर

बस्स एवढीच चुक तिची, फक्त एवढीच...

===============================
किरण जाधव..[तिच्या चुकांतून शिकणारा...]
===============================